Roy Keane, goðsögn Manchester United, baunaði hressilega á stjóra Arsenal, Mikel Arteta, í gær eftir stórleik helgarinnar.
Arsenal gerði 2-2 jafntefli við meistara Manchester City en spilaði manni færri eftir rauða spjald Leandro Trossard undir lok fyrri hálfleiks.
Arteta kvartaði yfir dómgæslunni eftir leik – eitthvað sem harðhausinn Keane var alls ekki of hrifinn af.
Arsenal stóð sig heilt yfir hetjulega í síðari hálfleiknum en Keane lét Arteta heyra það fyrir ummælin sem hann lét falla eftir leik.
,,Allir stjórar eru byrjaðir að kvarta í fjölmiðlum um að allar ákvarðanir séu gegn þeim. Hættu þessu og sættu þig við stöðuna,“ sagði Keane.
,,Að lokum þá verður hann sáttur með punktinn. Sýndu smá fagmennsku, stjóri Arsenal. Hann átti skilið að fá þetta rauða spjald, þeir brugðust vel við því og áfram gakk. Það er allt saman.“
,,Taktu lyfin þín og horfðu fram á við. Sýndu smá fagmennsku.“