Georgina Rodriguez, eiginkona Cristiano Ronaldo, spilaði stórt hlutverk í því að Portúgalinn færði sig til Sádi Arabíu í fyrra.
Georgina greinir sjálf frá þessu en hún var ekki ánægð með lífið í Manchester en eiginmaðurinn lék þar með Manchester United.
Ronaldo er einn launahæsti leikmaður heims í dag og sér sjálfur væntanlega ekki eftir því að hafa skipt yfir í hitann í Sádi.
,,Þegar Cris sagði við mig að hann ætlaði að spila fyrir Al-Nassr þá var ég svo ánægð því ég vildi komast burt frá Manchester,“ sagði Georgina.
,,Ég vissi að eitthvað stórt væri að bíða eftir okkur og við vildum taka þetta skref. Ég var svo ánægð þegar ég kom til Sádi Arabíu.“
,,Þetta gerðist allt mjög fljótt. Til að byrja með þá upplifði ég góða og slæma tíma því ég hef aldrei búið á hóteli svona lengi. Það komu dagar þar sem ég vildi ekki að neinn myndi sjá mig en heilt yfir var ég gríðarlega spennt.“