Hlaðvarpsstjarnan og knattspyrnusérfræðingurinn Hjörvar Hafliðason vonar að Arnar Gunnlaugsson haldi sig hjá Víkingi Reykjavík og vinni eins marga titla og mögulegt er hjá félaginu næstu árin.
Þetta segir Hjörvar í þætti sínum Dr. Football sem er afskaplega vinsæll en hann ræddi við þá Hjálmar Örn Jóhannsson og Gunnar Birgisson.
Arnar hefur gert frábæra hluti með Víking undanfarin ár og er mögulega tímaspursmál hvenær hann tekur skrefið erlendis.
Umræðan í þættinum var ansi skemmtileg en Hjörvar telur að Arnar sé jafnvel orðinn óvinsæll á meðal landsmanna þar sem Víkingar virðast vera að taka yfir flesta keppnir hérlendis.
,,Arnar Gunnlaugsson, meira að segja hann er að verða óvinsæll. Þegar þú vinnur og ert á toppnum þá er ekkert rosalega gaman að vera til,“ sagði Hjörvar.
,,Það er endalaust sótt þér á toppnum, það er fokking óþolandi!“
Hjörvar hélt umræðunni áfram síðar meir og segir að Arnar ætti að halda sig hér heima eins lengi og mögulegt er.
,,Ef ég væri Arnar Gunnlaugsson myndi ég aldrei fara til útlanda að þjálfa. Ég myndi reyna að safna eins mörgum bikurum og ég gæti á Íslandi.“
,,Þessi fimm ár sem hann hefur verið hérna, hann hefur verið bikaraóður. Það hefur enginn stigið svona inn á sviðið. Reyndar Gaui [Guðjón Þórðarson] gerði þetta. Heimir Guðjónsson gerði þetta líka.“
Gunnar nefndi nokkur nöfn á móti eins og Frey Alexandersson og Heimi Hallgrímsson en þeir starfa báðir erlendis – Freyr er hjá Kortrijk í Belgíu og Heimir er landsliðsþjálfari Írlands.
Umræðuna má heyra hér fyrir neðan.