Darrell Clarke þjálfari Barnsley hótar því að slá leikmenn sína utan undir ef þeir voga sér að tala niður leikmenn í ensku úrvalsdeildinni.
Barnsley fékk 7-0 skell gegn Manchester United í gær í enska deildarbikarnum.
„Ef ég heyri leikmenn mína aftur tala um leikmenn í úrvalsdeildinni og að þeir séu lélegir, þá slæ ég þá utan undir,“ sagði Clarke.
„Við vorum svo langt á eftir þeim og þeir eru lið sem slátra þér ef þú ert ekki á tánum.“
„United er með frábært lið en við erum svekktir með okkar frammistöðu. Við gerðum okkur engan greiða.“
Clarke vonast til að koma Barnsley upp úr þriðju efstu deild en liðið endaði í sjötta sæti á síðustu leiktíð.