Eftir verulega fjölgun áhorfenda á leiki í Bestu deild karla fyrri hluta tímabilsins hefur aðsókn dregist saman á síðari hlutanum. Eftir fyrstu 9 umferðirnar var tæplega 17% fjölgun áhorfenda frá árinu 2023 en frá og með 10. umferð hafa verið færri áhorfendur í nánast hverri umferð sé miðað við árið á undan, þ.e. á tímabilinu frá miðjum júní og allt fram að síðustu umferð hafa færri áhorfendur sótt hverja umferð en keppnistímabilið 2023.
Þrátt fyrir það hafa þó fleiri áhorfendur sótt leikina í þessum 18 umferðum heldur en í fyrrasumar, fjölgunin er um 1% en rúmlega 95 þúsund áhorfendur hafa sótt vellina í Bestu deild karla eða að jafnaði 884 áhorfandi á hverjum leik.
Líkt og á öðrum viðburðum má hugsanlega rekja dræma aðsókn síðari hluta tímabilsins til súldar sem hefur haldið sig yfir Íslandi undanfarnar vikur og mánuði en enn á eftir að ljúka 3 umferðum og vonandi verður spenna í mótinu sem dregur að fjölda áhorfenda.
Ein skýring á minnkandi aðsókn í júní og fram í júlí gæti jafnframt verið sú að brottförum Íslendinga til útlanda í júní 2024 fjölgaði um 17% frá árinu áður skv. upplýsingum frá Ferðamálastofu, en voru umtalsvert færri í upphafi keppnistímabilsins í samanburði við árið 2023.
Eins og staðan er í dag er a.m.k. allt sem bendir til þess að síðustu umferðirnar geti boðið upp á athyglisverða leiki sem og úrslitakeppnin sem hefst 22.september. Mikil spenna er á toppi deildarinnar, barátta um Evrópusæti er grjóthörð þar sem 4.sæti deildarinnar gæti gefið Evrópusæti á næsta ári og botnbaráttan er jafnframt æsispennandi.
Besta aðsóknin hefur verið á Kópavogsvöll hjá Breiðablik en 1.250 áhorfendur hafa sótt heimaleiki liðsins að meðaltali það sem af er tímabilinu en þar á eftir koma KR, Valur og Víkingur.