„Það er fínt að koma til Íslands og róa sig niður eftir marga langa daga, gott að fá að slaka á í hausnum,“ segir Orri Steinn Óskarsson nýr framherji Real Sociedad og íslenska landsliðsins.

Orri er mættur hingað til lands til að undirbúa sig undir landsleiki gegn Svartfjallalandi og Tyrklandi.

Orri skrifaði undir hjá Soceidad á föstudag þegar félagaskiptaglugginn lokaði en spænska liðið keypti hann á 3 milljarða frá FCK í Danmörku.

„Ég fór nú ekki mikið að hugsa út í þetta fyrr en á gluggadeginum, ég átti leik daginn á undan og var einbeittur á hann með FCK. Þegar þetta kom upp fanst mér mikilvægt að líta á þennan kost og það heillaði mig mikið.“

Orri var í allt sumar orðaður við stórlið út um alla Evrópu en segir það ekki hafa truflað sig.

„Það skipti mig engu máli, þó svo það sé orðrómur þá reyni ég að loka á það. Það sást á frammistöðum mínum í sumar að það hafði engin áhrif á minn leik.“

Manchester City var eitt þeirra liða sem hafði áhuga á að kaupa Orra sem pældi þó lítið í því. Hann var þó ekki spenntur fyrir því að fara þangað.

„Það er mikið stolt, það er geggjað að heyra. Það heillaði mig ekkert rosalega þessa stundina, það var ekki beint leiðin sem ég vildi fara.“

Orri er spenntur fyrir því að máta sig við liðin á Spáni en Sociedad mætir Real Madrid í næsta leik.

„Það er mjög spennandi, ég er mjög glaður og spenntur fyrir þessari áskorun. Miða sig við þessa leikmenn, að spila við heimsklassa leikmenn.“

„Það var gott að fá fyrsta leikinn snemma henda sér út í djúpu laugina. Það var mikið að gerast fyrstu þrjá dagana, mikil þreyta og áreiti. Það var geggjað að spila en maður var til í smá pásu, við fáum góðan tíma eftir landsleikina og svo er leikur við Real Madrid. Það er geggjað.“

Í upphafi árs var Orri hreinlega varamaður í FCK og stundum komst hann ekki í hóp, flestum þótti það skrýtið enda sáust gæði Orra þegar hann fékk tækifæri. Hann nýtti mótlætið og er stoltur af því.

„Þú ferð þangað sem hausinn þinn tekur, ég sýndi sterkt hugarfar að vinna mig aftur inn í liðið FCK og taka yfir framherjastöðuna. Á einhverjum tímapunkti í sumar var ekki spurning hver væri besti framherjinn í þessu liði, ég var mjög stoltur af því. Þetta var ekki lítið fjall sem ég þurfi að klífa.“

Íslenska liðið mætir Svartfjallalandi á föstudag á Laugardalsvelli í Þjóðadeildinni. „Þetta eru engir æfingaleikir, við verðum að nýta þá í þau stig sem við þurfum.“

Orri berst við Andra Lucas Guðjohnsen um stöðu framherja í liðinu og segir það heilbrigða samkeppni. „Andri er frábær leikmaður og ég er góður líka, það er frábær samkeppni. Það er gaman að vera í góðri samkeppni við Andra.“

Margir horfa í það að Orri og Andri byrji leiki saman, hann segir að það eigi að ganga upp. „Ég og Andri eigum gott samband utan vallar og ég efast ekki um að það sé eitthvað verra innan vallar.“