Fyrrum undrabarnið Facundo Pellistri hefur útskýrt af hverju hann yfirgaf lið Manchester united í sumar.
Pellistri hefur gert samning við Panathinaikos í Grikklandi þar sem hann mun spila stórt hlutverk í vetur.
Pellistri gekk í raðir United árið 2020 frá Penarol í Úrúgvæ en spilaði aðeins 25 leiki í Manchester og skoraði ekkert mark.
Hann segist hafa þurft að yfirgefa félagið í glugganum eftir að hafa verið lánaður þrisvar til Alaves og svo Granada.
,,Ég hafði tekið þessa ákvörðun stuttu áður en ég byrjaði að æfa aftur. Ég vissi að það væri mikilvægt fyrir mig að fá að spila á þessum aldri,“ sagði Pellistri.
,,Ég hefði getað spilað í Manchester en þar hefði staðan verið flóknari. Ég hefði ekki fengið þær mínútur á árinu sem ég myndi vilja svo við þurftum að skoða aðra möguleika.“
,,Allir möguleikarnir sem ég skoðaði komu frá Evrópu, ég var ekki í sambandi við lið í Suður-Ameríku.“