Gylfi sneri aftur í landsliðið síðasta haust en hefur síðan ekki verið með. Landsmenn eru spenntir að sjá hann í bláu treyjunni á ný.
„Þetta eru gleðitíðindi fyrir landsliðið. Þó það hafi bara verið Liechtenstein fyrir ári þá skoraði hann tvö og var langbesti maður vallarins. Hann hefur átt fína spretti með Val en þegar hann verður farinn að spila með leikmönnum á sínu getustigi, með fullri virðingu fyrir leikmönnum Vals, þá eru bara tíu betri leikmenn sem hann spilar með í íslenska landsliðsbúningnum. Ég held að það muni bara ýta Gylfa hærra,“ sagði Hörður Snævar Jónsson í þættinum.
Gylfi gekk í raðir Vals í vetur og hefur ekki farið leynt með það að markmiðið sé að spila aftur með landsliðinu.
„Hann er búinn að vera í þessu volæði sem hefur verið í gangi hjá Val sem liði undanfarið. Allir hafa talað um að það sé aðeins neikvæðari líkamstjáning og allt þetta. Þetta er svo mikil gulrót fyrir hann, þetta er ástæðan fyrir því að hann er í þessu ennþá,“ sagði Helgi Fannar Sigurðsson.
Hörður tók undir þetta og bætti við.
„Þetta er ástæða þess að hann er enn í fótbolta. Við skulum alveg hafa það á hreinu að Gylfi Þór Sigurðsson er ekki enn í fótbolta til að borga reikninga eða þéna peninga. Hann langar að vera í íslenska landsliðinu og telur sig mögulega eiga tvö ár eftir í fótbolta þar sem hann getur mögulega endað á einhvern draumfenginn hátt á HM. Maður veit aldrei hvenær menn eru búnir en oft er það þannig með menn sem hafa aldrei gert út á hraða eða styrk að þeir endast aðeins lengur. Við sjáum bara Luka Modric og fleiri sem hafa nýtt hielann á sér í að vera góðir í fótbolta.“
Verði Gylfi nú fastamaður í landsliðinu á ný útilokar Hörður ekki að hann skipti um lið eftir tímabilið á Íslandi til að vera í sem bestu leikformi.
„Ég myndi ekki útiloka það. Segjum að hann sé í hópnum í þessum verkefnum í september, október, nóvember, samtalið við Hareide verði þannig að hann sjái hann sem lykilmann í undankeppninni á næsta ári. Þá eru leikir í mars og þá er kannski ekkert sérstaklega gott fyrir Gylfa að hafa ekki spilað alvöru keppnisleik síðan í október. Getur hann farið á láni fram að því að Íslandsmót byrj? Ég held að Valur myndi taka þátt í því. Það er eitthvað sem segir mér að Gylfi eigi eftir að spila fyrir annað lið en Val.“
Nánar var rætt um landsliðið í þættinum, sem má nálgast hér að neðan og á helstu hlaðvarpsveitum.
