Age Hareide landsliðsþjálfari Íslands segir að Aron Einar Gunnarsson komi ekki til greina í landsliðshópinn á meðan hann spilar fyrir Þór í Lengjudeildinni.
Aron Einar samdi við Þór á dögunum og hefur spilað síðustu leiki, allar líkur eru á því að hann fari þó erlendis á næstu dögum.
Aron Einar er með möguleika í Belgíu og í Katar og færi þá á láni frá Þór.
„Ég hef rætt við Aron, hann hefur verið að láta mig vita af því sem hann hefur verið að gera og sjúkraþjálfarar okkar hafa skoðað ökklann hans,“ segir Hareide um stöðuna á Aroni.
Hareide segir að það sé ekki nógu gott að spila í Lengjudeildinni til að komast í landsliðið. „Hann verður að koma sér í form til að geta komið sér í landsliðið, hann verður að spila á hærra getustigi en hjá Þór ef hann ætlar að koma í landsliðið.“
Aron er að koma til baka eftir erfið meiðsli en þessi fyrirliði íslenska landsliðsins stefnir á það að komast í landsliðshópinn á nýjan leik.