Selfyssingar unnu leikinn 1-2 og eru svo gott sem komnir upp í Lengjudeildina. Haukar eru aftur á móti endanlega úr leik í þeirri baráttu.
Seinna mark Selfyssinga kom af vítapunktinum og var þar að verki Gonzalo Zamorano, sem var að skora sitt annað mark í leiknum. Pétur Guðmundsson, reynslumikill dómari leiksins, verður þó sennilega ekki allt of sáttur með ákvörðun sína að dæma vítið.
Aron Fannar Birgisson fór niður í teignum, en í endursýningu má sjá að markvörður Hauka, Magnús Kristófer Anderson, snerti hann ekki. Pétur féll þó fyrir leikrænum tilþrifum Arons og vítaspyrna dæmd.
Töluverð umræða skapaðist um dóminn eftir að upptaka af atvikinu birtist á X (áður Twitter).
„Hvernig í ósköpunum dæmir Pétur víti þarna?“ var til að mynda skrifað.
„Hélt að lögreglan hefði vökulli augu en þetta, þetta eru ákveðin vonbrigði frá nafna mínum,“ skrifaði annar, en Pétur starfar einnig sem lögreglumaður.
Hér að neðan má sjá atvikið sem um ræðir.
Hvernig í ósköpunum dæmir Pétur víti þarna? 🥸 pic.twitter.com/yaeeylUley
— Birkir Ragnars (@Birkiorri) August 26, 2024