Fyrrum knattspyrnuþjálfarinn Sven-Göran Eriksson er látinn, 76 ára að aldri, eftir baráttu við krabbamein í brisi. Greint var frá andláti hans í gær.
Í upphafi þessa árs greindi Svíinn frá veikindum sínum og sagðist eiga ár eftir í besta falli. Um er að ræða fyrrum landsliðsþjálfara Englands, sem og liða eins og Manchester City, Roma, Lazio og Fiorentina.
Eriksson var vel liðinn sem þjálfari enska landsliðsins og áttu hann og David Beckham einstakt samband, sá sænski gerði Beckham að fyrirliða enska liðsins.
Beckham ákvað á dögunum að fara til Svíþjóðar og eyða heilum degi með Eriksson, vissu þeir báðir að þetta var í síðasta sinn sem þeir myndu hittast.
„Við hlógum, við grétum og við vissum að þetta væri kveðjustund,“ skrifar Beckham í færslu á Instagram og birtir stutt myndband af þeirra kveðjustund.
„Takk fyrir Sven að vera alltaf sama persónan, ástríðufullur, umhyggjusamur, rólegur og einstakur herramaður.“
„Ég verð þér alltaf þakklátur fyrir að gera mig að fyrirliða en ég mun alltaf eiga minninguna af þessum síðasta hittingi með þér og fjölskyldu þinni. Takk fyrir og ég hugsa um þín síðustu orð til mín ´þetta verður í lagi´.“
View this post on Instagram