Stjörnu úr ensku úrvalsdeildinni hefur verið sparkað af eiginkonu sinni eftir að upp komst um framhjáhald hans. Helstu miðlar á Englandi fjalla um málið.

Málið hófst þannig að eiginkonan fékk send skilaboð á Instagram af eiginmanni sínum og annarri konu í rúmi þeirra þar sem stóð: „Ég svaf hjá manninum þínum.“ Á þetta að hafa gerst á meðan hún var í ferðalagi með ung börn hennar og knattspyrnumannsins.

„Eiginkonan er í áfalli og er miður sín. Ekkert getur búið þig undir svona lagað,“ segir heimildamaður enskra blaða. Á knattspyrnumaðurinn þá að hafa haldið því fram að myndin af honum og konunni í rúminu hafi verið fölsuð.

Myndavél á dyrasíma fjölskyldunnar á hins vegar að hafa komið endanlega upp um hann. Þar má sjá sömu konu og myndin í rúminu var af ganga inn í húsið.

Samkvæmt enskum miðlum er hjónabandinu nú lokið. Þar kemur einnig fram að leikmaðurinn sem um ræðir hafi verið hluti af landsliði á EM í Þýskalandi í sumar. Liðsfélagar hans þar hafi þá vitað af framhjáhaldinu.

Eiginkonan sem um ræðir er sögð vera mjög þekkt og hefur hún verið gift knattspyrnumanninum í mörg ár.