Jarrad Branthwaite, miðvörður Everton, gæti óvænt gengið í raðir Liverpool fyrir gluggalok ef marka má The Sun.
Hinn 22 ára gamli Branthwaite var sterklega orðaður við Manchester United fyrr í sumar en Rauðu djöflarnir gengu ekki að verðmiða Everton.
The Sun heldur því fram að Liverpool muni bjóða 70 milljónir punda á næstu dögum, 63 milljónir punda fyrirfram og 7 milljónir síðar meir.
Branthwaite vill spila fyrir stærra félag, en það kæmi sannarlega á óvart að hann færi til erkifjenda Everton í Liverpool. Enginn hefur farið þessa leið síðan Abel Xavier gerði það árið 2002.
Branthwaite þénar 60 þúsund pund á viku hjá Everton en talið er að sú upphæð myndi þrefaldast með skiptum á Anfield.
Arne Slot, stjóri Liverpool, er sagður bjartsýnn á að landa Branthwaite.
