Jóhann Berg Guðmundsson er genginn í raðir sádiarabíska félagsins Al-Orobah frá Burnley. Hann kveður enska liðið eftir átta ár þar.
Meira
Sádarnir staðfesta komu Jóa Berg – Kynntur til leiks með skemmtilegu myndbandi
Jóhann gerir eins árs samning í Sádí, en Al-Orobah er nýliði í úrvalsdeildinni. Hann segir við heimasíðu Burnley að hlutirnir hafi gerst mjög hratt undanfarna daga.
„Ég átti ekki von á þessu. Ég fékk boð sem var of gott til að hafna, spennandi verkefni. Ég var staðráðinn í að koma aftur hingað og standa mig fyrir Burnley en mér fannst ég kannski þurfa nýja áskorun. Þetta tækifæri kom upp og það er gott fyrir mig á efri árum ferilsins. Ég vil spila fótbolta eins lengi og mögulegt er og taldi ég þetta rétta skrefið að taka núna,“ segir Jóhann.
Jóhann segir ljóst að það verði viðbrigði fyrir hann og fjölskyldu hans að flytja frá Englandi til Sádí.
„Þetta er allt öðruvísi menning sem við erum að fara í. En við komum frá Íslandi og erum nokkuð góð í að aðlagast. Þetta verður auðvitað erfitt fyrir fjölskylduna. Við höfum verið hér í átta ár, börnin eru í skóla hérna og eru ánægð. Þetta er tækifæri fyrir okkur til að vaxa sem fjölskylda líka.“
Jóhann hefði vart getað endað veru sína hjá Burnley betur. Hann skoraði í 5-0 sigri á Cardiff um síðustu helgi.
„Það er erfitt að kveðja, ég kvaddi, kom aftur og kveð nú aftur. Þetta eru miklar tilfinningar. Það var stórkostlegt að spila á Turf Moor og skora. Það var töfrum líkast. Ég er svo ánægður að hafa endað þetta með marki á Turf Moor í 5-0 sigri.
Takk fyrir öll árin. Þetta hefur verið upp og niður hjá liðinu og mér persónulega. Ég glímdi auðvitað nokkrum sinnum við meiðsli og það var erfitt en alltaf þegar ég kom til baka tóku stuðningsmennirnir svo vel á móti mér. Þeir hafa komið ótrúlega vel fram við mig og mína fjölskyldu. Takk fyrir allan stuðninginn, ég sé ykkur aftur fljótt,“ sagir Jóhann.
Viðtalið í heild er hér að neðan.