Goðsögnin Paul Gascoigne viðurkennir að hann sakni fótboltans en hann lagði skóna á hilluna fyrir þónokkru síðan.
Gascoigne hefur reglulega komist í fréttirnar en hann glímir við áfengisvandamál sem hann á erfitt með að hafa stjórn á.
Um er að ræða fyrrum stórkostlegan leikmann sem lék ófáa landsleiki fyrir England og var í uppáhaldi hjá mörgum.
Gascoigne hatar í raun að horfa á leikinn í dag þó hann sakni þess að spila en hann er ekki hrifinn af yngri kynslóðinni sem er nú að taka yfir leikinn.
,,Ég sakna leiksins svo mikið enn þann dag í dag, mjög mikið. Þegar ég horfi á ömurlegan leikmann á 300 þúsund pundum á viku hugsa ég með mér: ‘Guð minn almáttugur,’ sagði Gascoigne.
,,Það sem pirrar mig mest er að þegar þeir skora þá fagna þeir ekki mörkunum. Þeir gleyma því að foreldrar gætu mætt með börnunum sínum á leikinn og það er ekki ódýrt.“
,,Þú þarft að borga fyrir ferðina, matinn, miðana og svo þegar leikmaðurinn skorar þá pælir hann ekkert í þeirri staðreynd. Ég þoli það ekki.“