Erik ten Hag, stjóri Manchester United, er ekki reiður út í vængmanninn Jadon Sancho eftir atvik gærdagsins.
Sancho klikkaði á vítaspyrnu í vítaspyrnukeppni gegn Manchester City í Samfélagsskildinum og töpuðu þeir rauðklæddu að lokum.
Jonny Evans var hinn sem klúðraði spyrnu United í tapinu en Bernardo Silva var sá eini sem klikkaði fyrir Englandsmeistarana.
Sancho er mættur aftur í leikmannahóp United eftir rifrildi við Ten Hag síðasta vetur og vonast til að fá tækifæri á komandi tímabili.
,,Ég efaðist ekkert um hann fyrir vítaspyrnuna. Hann er mjög góður á punktinum og klikkaði í dag en það er hluti af leiknum,“ sagði Ten Hag.
,,Ég er handviss um það að hann fái að taka vítaspyrnur í framtíðinni.“