Nokkur umræða er á milli stuðningsmanna Arsenal eftir nýjustu ákvörðun Oleksandr Zinchenko og félagsins.
Þannig hefur bakvörðurinn frá Úkraínu skipt um númer á treyju sinni, hann var áður í treyju númer 35 en fer nú í treyju númer 17.
Númerið á sérstakan stað í hjarta Oleksandr Zinchenko sem notaði það sem ungur drengur.
„Þetta var númerið mitt sem ungur leikmaður og í landsliðinu vil ég alltaf klæðast treyju númer 17,“ segir Zinchenko.
Stuðningsmenn Arsenal sem ræða málið telja þetta merki um að Zinchenko fari ekki neitt í sumar en margir stuðningsmenn félagsins vilja hann burt.
Zinchenko var slakur á síðustu leiktíð og missti sæti sitt í liðinu og hafa verið sögur á kreiki um að hann færi en það er ekki líklegt úr þessu.