Gylfi Þór Sigurðsson miðjumaður Vals ferðaðist ekki með liðinu til Skotlands í gær fyrir leik liðsins gegn St. Mirren í Sambandsdeildinni á morgun.
Tíðindin láku út úr herbúðum Vals en margir töldu þetta líklegt þegar Gylfi spilaði allar 90 mínúturnar í tapi gegn Fram á sunnudag í Bestu deildinni.
„Ef ég væri þjálfari Vals, þá hefði ég spilað fléttuna þannig að ég hefði talað eins og Gylfi væri á leið út. Ég held að allur undirbúningur St Mirren færi í Gylfa pælingar. Ef Gylfi færi ekki með, þá hefði ég tekið tvífara hans með,“ sagði Hjörvar Hafliðason í nýjasta þætti af Dr. Football.
Hjörvar telur að það hefði verið klókt fyrir Arnar Grétarsson þjálfara liðsins og aðra að þegja um þetta og láta það koma Skotunum á óvart.
„Ég held að það sé svo óklókt að gefa þetta út. St Mirren fer kannski að vanmeta þá. Hvað hefðuð þið gert ef við væruð Arnar og Börkur?,“ sagði Hjörvar.
Fyrri leikurinn endaði með 0-0 jafntefli og því er allt opið. „Ég hefði alltaf haft hann í leikdagshóp, eru þetta ekki einhverjir 20 leikmenn þar. Ég hefði bara sett hann í hópinn, ekkert þurft að koma með út,“ sagði Hrafnkell Freyr Ágústsson, sérfræðingur Dr. Football.
„Ég hef enga trú á þessu án Gylfa,“ bætti Hrafnkell við.