Eins fáránlegt og það kann að hljóma þá er fyrrum framherji í ensku úrvalsdeildinni að íhuga að snúa aftur í efstu deild í heimalandinu, 41 árs gamall.
Það er kannski ekki það merkilegasta en um er að ræða Mido, fyrrum sóknarmann Tottenham, sem hefur ekki spilað fótbolta í 11 ár.
Mido lagði skóna á hilluna árið 2013 eftir stutt stopp hjá Barnsley en hann lék 51 landsleik fyrir Egyptaland á sínum tíma og skoraði 19 mörk.
Undanfarin ár hefur Mido tekið að sér störf sem þjálfari og vann síðast hjá liði sem heitir Ismaily.
,,Ég er ekki búinn að klára mína sögu. Ég er að íhuga að snúa aftur á völlinn og spila í úrvalsdeildinni í Egyptalandi,“ sagði Mido.
,,Ég er til í að veðja á það að ég muni skora allavega tíu mörk ef ég sný aftur. Það eru engir góðir framherjar þarna, það hvetur mig til að snúa aftur.“
,,Bráðlega þá mun ég semja við félag í Egyptalandi og mun taka þátt á undirbúningstímabilinu – ég er 60 prósent tilbúinn. Ég hætti aldrei í fótbolta, ég tók mér bara tíu ára pásu.“