Víkingur mætir Egnatia frá Albaníu í 2. umferð undankeppni Sambansdeildarinnar í kvöld. Arnar Gunnlaugsson, þjálfari liðsins, var spurður út í stöðuna á hópnum í viðtali við 433.is í gær.
Um er að ræða fyrri leik liðanna og fer hann fram hér heima. Bæði lið töpuðu í 1. umferð undankeppni Meistaradeildar Evrópu.
Lykilmaðurinn Aron Elís Þrándarson er snúinn aftur úr meiðslum, sem eru ansi góð tíðindi fyrir Víkinga.
„Aron lítur betur og betur út. Það eru allir að koma til baka. Menn eru að ná sér andlega og líkamlega eftir Shamrock leikina. Þetta lítur helvíti vel út,“ sagði Arnar.
Það virðist þó enn vera eitthvað í bakvörðinn Davíð Örn Atlason. Arnar vonast til að geta gefið honum mínútur í Bestu deildinni um helgina.
„Mögulega verður Davíð Atla ekki í hóp. Hann er byrjaður að æfa og mögulega gefum við honum mínútur á móti HK á sunnudag svo hann geti spilað útileikinn (gegn Egnatia).“
Hér að neðan má sjá viðtalið við Arnar í heild sinni, en þar var farið yfir víðan völl.