Jose Mourinho, stjóri Fenerbahce, var hundfúll í gær eftir leik sinna manna við Lugano í forkeppni Meistaradeildarinnar.

Leikið var í Thun í Sviss en Fenerbahce vann leikinn að lokum 4-3 eftir þrennu bosnísku goðsagnarinnar Edin Dzeko.

Lugano kaus að leika leikinn á gervigrasi, eitthvað sem Portúgalinn var virkilega óánægður með.

,,Við gerðum okkar besta til að notast ekki við afsakanir fyrir leikinn en að spila á gervigrasi er mikil áskorun fyrir okkur,“ sagði Mourinho.

,,Boltinn færist ekki eins og hann myndi gera á venjulegu grasi og leikmenn eiga í vandræðum með að rekja knöttinn og leikurinn er mun hægari.“

,,Ég get einfaldlega ekki skilið af hverju UEFA leyfir gervigras í Meistaradeildinni. Það er líka stórfurðulegt að gott lið eins og Lugano velji það að spila á þessum velli.“