Breski miðillinn Telegraph fjallar í dag um skipti Mason Greenwood frá Manchester United til Marseille. Þar er meðal annars komið inn á innihald samningsins sem félögin gerðu með sér.
Marseille keypti Greenwood fyrir um 27 milljónir punda í síðustu viku. United fær svo 50 prósent af næstu sölu á leikmanninum.
Þá setti United einnig inn áhugaverða klásúlu við skiptin sem Telegraph vekur athygli á. Sú klásúla er þannig að enska félagið hefur möguleika á að kaupa Greenwood til baka (e. buy back option).
Í greininni kemur þó fram að slík klásúla sé ansi algeng þegar kemur að sölu á uppöldum leikmönnum. Það kann þó að líta furðulega út þar sem United er aðallega að losa Greenwood vegna mála hans utan vallar.
Greenwood lék á láni frá United hjá Getafe á síðustu leiktíð og þótti standa sig afar vel.