Jadon Sancho er með áhugavert tilboð á borðinu frá Frakklandi ef marka má miðla þar í landi.
Foot Mercato segir í dag frá því að Paris Saint-Germain hafi sett sig í samband við kappann og gert honum tilboð sem hann er nálægt því að samþykkja að sögn miðilsins.
Sancho hefur mikið verið orðaður frá United í sumar. Hann var lánaður aftur til Dortmund í janúar á þessu ári eftir stríð við Erik ten Hag, stjóra enska liðsins. Á dögunum var hins vegar greint frá því að Ten Hag og Sancho væru búnir að grafa stríðsöxina.
Það breytir því þó ekki að kantmaðurinn er áfram orðaður burt. Nú er PSG sagt á eftir kappanum en félagið þarf einnig að semja við United, sem vill um 40 milljónir punda.
PSG leitar að stjörnuleikmanni í sóknarlínu sína eftir brottför Kylian Mbappe til Real Madrid.