Það eru alls ekki allir sem vita það að stjarnan Alex Iwobi hefur gefið út lag sem heitir ‘Don’t Shoot’ en það kom út fyrir um mánuði síðan.
Iwobi er fyrrum leikmaður Arsenal en leikur í dag með Fulham sem spilar í efstu deild Englands.
Iwobi gaf út lag í samstarfi við vini sína en hann ræddi um af hverju í samtali við Evening Standard.
Sóknarmaðurinn segist vera að senda jákvæð skilaboð til yngri kynslóðarinnar sem gæti verið við það að taka rangt skref á lífsleiðinni.
,,Ég ólst upp í London þar sem er mikið um glæpi, hlutir sem þú vilt ekki sjá eða heyra,“ sagði Iwobi.
,,Á okkar hátt erum við að segja fólki að láta allt það vera, notið orkuna í eitthvað annað. Hvort sem það sé fótbolti eða tónlist, hvað sem heldur þér á beinu brautinni.“
,,Ég hef alltaf elskað tónlist en ég bjóst reyndar aldrei við því að gefa út lag. Þetta var gert eftir það sem vinir mínir höfðu að segja um lögin.“