Það voru margir spenntir þegar enska úrvalsdeildarfélagið Arsenal keypti vængmanninn Nicolas Pepe frá Lille árið 2019.
Pepe stóðst aldrei væntingar hjá Arsenal en hann skoraði aðeins 16 mörk í 80 leikjum eftir að hafa kostað 72 milljónir punda.
Fílabeinsstrendingurinn missti alla ástríðu fyrir íþróttinni í London en hann leikur í dag með Trabzonspor í Tyrklandi.
Pepe hefur tjáð sig um erfiða tíma en hann sér í raun eftir því að hafa tekið skrefið til Arsenal.
,,Ég upplifði nokkurs konar sjokk hjá Arsenal, það var eins og þeir hefðu tekið ástríðuna af mér,“ sagði Pepe.
,,Ég hataði leikinn. Ég var ekki að spila og spurði sjálfan mig af hverju ég væri að sinna þessu starfi.“
,,Það var svo margt sem ég efaðist um og íhugaði oft að einfaldlega hætta. Ég spurði mig einnig að því af hverju ég væri að fá svona mikið hatur.“
,,Þeir fóru svo langt og kölluðu mig verstu mistök í sögu ensku úrvalsdeildarinnar. Ég vildi eitthvað nýtt þegar ég fór frá Arsenal og mér var andskotans sama um peningana.“