Landsliðsmaðurinn Sverrir Ingi Ingason hefur ekkert verið í hóp hjá Midtjylland á yfirstandandi undirbúningstímabili. Framtíð hans hjá félaginu gæti skyndilega verið í lausu lofti.
Þetta kemur fram í Dr. Football og kemur á óvart þar sem Sverrir skrifaði undir stóran fimm ára samning við Midtjylland í fyrra. Liðið varð danskur meistari á síðustu leiktíð þar sem miðvörðurinn var lykilmaður.
„Það er eitthvað mjög skrýtið að gerast hjá Midtjylland,“ segir Hjörvar Hafliðason í Dr. Football.
„Hann skrifar undir í fimm ár, verður meistari og maður hélt að lífið léki við hann. Hann er ekkert í hóp núna og svo var ég að heyra í félaga mínum áðan, hann sagði mér að hann væri heill. Hann fær bara ekki að vera með.“
Keppni í dönsku úrvalsdeildinni hefst á ný á föstudag þegar Midtjylland heimsækir AGF.
„Það hefur eitthvað súrnað, það er eitthvað í gangi,“ segir Hjörvar að endingu um málið.
Uppfært kl. 13:18.
Sverrir er á leið til gríska félagsins Panathinaikos. Hann skrifar undir þriggja ára samning og snýr þar með aftur til Grikklands, en hann kom til Midtjylland frá PAOK í fyrra.