BBC hefur gefið frá sér yfirlýsingu í kjölfar þess að stöðin var harðlega gagnrýnd fyrir að gera grín að Cristiano Ronaldo.

Eftir að Ronaldo klikkaði á víti fyrir Portúgal gegn Slóvenum í 16-liða úrslitum EM setti BBC á skjáinn „Misstiano Penaldo“ í endursýningunni. Portúgal vann þó leikinn að lokum en féll svo úr leik í 8-liða úrslitum gegn Frökkum.

Grín breska ríkissjónvarpsins fór öfugt ofan í marga og nú hefur stöðin sent frá sér yfirlýsingu.

„Þetta átti aðeins að vera orðagrín, eins og við höfum oft verið með áður. Þetta átti ekki að vera móðgandi,“ segir meðal annars í yfirlýsingunni.

„Þess má geta að í útsendingunni var Ronaldo oft hrósað í hástert,“ kemur enn fremur fram og nokkur dæmi tekin um það.