Það er nóg að gera á skrifstofu Manchester United þessa stundina og nokkrir leikmenn á óskalistanum.
Í gærkvöldi greindu helstu miðlar ytra að United væri búið að leggja fram nýtt og betra tilboð í Jarrad Branthwaite, miðvörð Everton. Síðarnefnda liðið hafnaði 35 milljóna punda tilboði United samstundis á dögunum og er talið að félagið vilji tvöfalt meira fyrir þennan afar öfluga 22 ára gamla leikmann.
Nýtt tilboð United hljóðar upp á 45 milljónir punda auk 5 milljóna punda síðar meir. Vonast Rauðu djöflarnir til að það fái Everton í það minnsta í viðræður, en félagið hefur þegar samið við Brantwaite sjálfan um hans kjör.
Þó United fái Branthwaite útilokar það ekki að félagið kræki í Matthijs de Ligt, miðvörð Bayern Munchen. Talið er að hann kosti 43 milljónir punda.
Þá er Joshua Zirkzee áfram sterklega orðaður við félagið og virðast viðræður við Bologna ganga vel.
Loks vill United fá varnarsinnaðan miðjumann á svæðið og hefur Manuel Ugarte hjá Paris Saint-Germain til að mynda verið nefndur til sögunnar í því samhengi.