Gary Lineker viðurkennir að hann hafi nánast tárast er hann sá Bukayo Saka skora úr vítaspyrnu gegn Sviss á dögunum í 8-liða úrslitum EM.
Saka klikkaði á mikilvægri spyrnu á EM 2020 en England tapaði úrslitaleiknum gegn Ítalíu það ár.
Saka skoraði hins vegar af miklu öryggi er hann steig á punktinn að þessu sinni sem minnti Lineker á fyrrum liðsfélaga sinn Stuart Pearce sem lenti í því sama á sínum tíma.
,,Tilfinningarnar tóku aðeins yfir þegar ég horfði á þetta. Þetta minnti mig á vítaspyrnu Stuart Pearce,“ sagði Lineker.
,,Pearce klikkaði á vítaspyrnu 1990 þegar ég var að spila. Ég þekki Stuart, þið þekkið Stuart. Hann er svo mikill toppmaður og var frábær leikmaður.“
,,Svo árið 1996 spiluðum við gegn Spánverjum og hann tók aðra vítaspyrnu. Ég óskaði þess að hann myndi skora, ekki klúðra, allir í stúkunni voru að hugsa það sama.“
,,Hann skoraði svo úr spyrnunni og ég fór að gráta, ég var í stúkunni, grátandi af gleði. Ég græt ekki þegar ég er leiður, ég græt þegar ég er ánægður.“
,,Vítaspyrna Saka minnti mig á þetta augnablik.“