Bukayo Saka var hetja Englands er liðið sló Sviss úr leik í 8-liða úrslitum EM á laugardag. Hann fékk hjartnæm skilaboð frá samlanda sínum og félaga eftir leik.
Saka jafnaði leikinn í 1-1 í venjulegum leiktíma og vann England svo í vítaspyrnukeppni, þar sem Saka skoraði úr sínu víti.
„Ég er svo stoltur af þér. Þú gerðir þetta fyrir mig og Marcus,“ skrifaði Jadon Sancho, leikmaður Manchester United, til Saka á Instagram eftir leik.
Sagan á bak við þetta er sú að í úrslitaleik EM fyrir þremur árum klikkuðu Marcus Rashford, Saka og Sancho allir á vítaspyrnum í vítaspyrnukeppninni gegn Ítölum. Urðu þeir í kjölfarið fyrir miklu kynþáttaníði.
Hvorki Sancho né Rashford eru í enska landsliðshópnum á EM sem nú stendur yfir, en Englendingar mæta Hollandi í undanúrslitum á miðvikudag.
Hér að neðan er færsla Sancho.