„Þetta hefði verið skemmtilegasti úrslitaleikurinn miðað við það sem við höfum séð hingað til,“ sagði Helgi Fannar Sigurðsson um leikinn í hlaðvarpi Íþróttavikunnar.
„Þetta eru liðin sem hafa skemmt manni, það eru ekki mörg lið sem hafa lagt neitt upp úr því að skemmta okkur,“ sagði Hörður Snævar Jónsson þá.
Bæði lið unnu riðla sína og andstæðinga sína í 16-liða úrslitum nokkuð örugglega.
„Þetta er svolítið skrýtið, bæði lið hafa gert allt rétt, unnið riðlana sína og í 16-liða úrslitum, samt mætast þau í 8-liða úrslitum. Manni finnst þetta hálf grimmt,“ sagði Helgi.
„Það verður til svolítið ruglingslegt kerfi þegar þessi 3. sæti eru að þvælast með. Við sjáum að Hollendingar enda í 3. sæti og eru að fá Tyrki í 8-liða úrslitum,“ sagði Hörður þá.
„Þetta er bara hlægilegt,“ skaut Helgi inn í.
Mikið hefur verið rætt og ritað um að UEFA þurfi að breyta fyrirkomulaginu á EM, en 24 lið taka þar þátt í dag.
„Það er spurning hvort UEFA þurfi ekki bara að fjölga þessu um 8 lið í viðbót. Þessi riðlakeppni er orðin hálfger forkeppni,“ sagði Hörður.