Erik ten hag hefur skrifað undir nýjan samning við Manchester United sem gildir til tveggja ára. Fyrri samningur hans átti að renna út eftir ár.
Hollenski stjórinn fær því eins árs framlengingu á samningi sínum eftir að félagið hafði skoðað það að reka hann í sumar.
„Ég er mjög sáttur með að samkomulag okkar um að halda áfram sé í höfn, við höfum bætt okkur á hinum ýmsu sviðum eftir að ég tók við,“ segir Ten Hag.
„Við verðum líka að horfa í það að það er mikil vinna sem er eftir til að komast á það stig sem Manchester United vill vera á. Það er að vinna deildina og berjast í Evrópu.“
„Í samtali mínu við klúbbinn vorum við sammála um hugmyndafræði okkar í átt að þeim markmiðum.“
Dan Ashworth yfirmaður knattspyrnumála hjá United fagnar þessum tíðindum. „Með tvo titla á tveimur árum hefur Erik sannað sig sem einn öflugasti þjálfari Evrópu,“ segir Dan Ashworth.
„Þetta lið og þjálfarateymið hefur sannað að það getur unnið titla en núna þarf að finna stöðugleika.“