Víkingur er kominn í úrslit Mjólkurbikars karla og freistar þess að vinna fimmta titil sinn í röð. Liðið tók á móti Stjörnunni í hádramatískum leik í kvöld.
Heimamenn stýrðu leiknum í fyrri hálfleik en það tók tíma að brjóta gestina á bak aftur. Það tókst hins vegar á 42. mínútu þegar hinn magnaði Danijel Dejan Djuric skoraði. Staðan í hálfleik var 1-0.
Stjarnan hótaði því að jafna í seinni hálfleik en vonin virtist vera að renna út í sandinn þegar reynsluboltinn Guðmundur Kristjánsson skoraði í uppbótartíma og tryggði Garðbæingum framlengingu.
Í framlengingunni var ekkert skorað en Víkingur komst næst því að setja boltann í netið þegar Mathias Rosenörn varði á ótrúlegan hátt skot Gísla Gottskálks Þórðarsonar af stuttu færi.
Það var því farið í vítaspyrnukeppni og þar vann Víkingur 5-4. Liðið er því komið í bikarúrslit enn eitt árið.