Jude Bellingham og Declan Rice verður ekki refsað fyrir hegðun sína í sigri Englands á Slóvakíu í 16-liða úrslitum Evrópumótsins í gær. Þetta kemur fram í helstu miðlum ytra.
Eftir ömurlega frammistöðu Englands bjargaði Bellingham liðinu með því að jafna með hjólhestaspyrnu í blálok venjulegs leiktíma. Enska liðið vann svo í framlengingu.
„Hver annar?“ sagði Bellingham eftir að hafa skorað markið en það eru handahreyfingar hans í kjölfarið sem vekja athygli og var því velt upp hvort þær gætu komið honum í vandræði.
Meira
Sjáðu hvað Bellingham gerði í gær og náðist á myndband – Lendir hann í vandræðum?
Sjálfur segir Bellingham að um einkahúmor hafi verið að ræða sem beindist að vinum hans í stúkunni, ekki varamannabekk Slóvakíu eins og hafði verið gefið í skyn.
Rice lenti þá í átökum við þjálfara Slóvaka, Francesco Calzona, eftir leik. Eftir að Calzona hafði stjakað við enska miðjumanninum lét Rice hann heyra það. Daily Mail fékk varalesara til að skoða hvað Rice sagði og á hann að hafa sagt: „Þegiðu aumingi, þegiðu sköllótta ruslið þitt.“
Rice á þó að hafa beðist afsökunar í kjölfarið.
Þeim verður sem fyrr segir ekki refsað af UEFA og mega spila leikinn gegn Sviss í 8-liða úrslitum.