Paris Saint-Germain gæti verið tilbúið að setja heimsmet til að næla í einn efnilegasta ef ekki efnilegasta leikmann heims, Lamine Yamal.
Frá þessu greinir Mundo Deportivo á Spáni en dýrasti leikmaður sögunnar er Neymar sem fór frá Barcleona til PSG á sínum tíma.
Neymar kostaði 198 milljónir punda á þeim tíma en hann er í dag í Sádi Arabíu.
Yamal er aðeins 16 ára gamall og hefur vakið verulega athygli á EM í Þýskalandi þar sem Spánverjar eru sigurstranglegir.
Samkvæmt Mundo þá er PSG tilbúið að greiða Barcelona 211 milljónir punda fyrir Yamal, eitthvað sem spænska félagið ætti erfitt með að hafna.
Barcelona er eins og flestir vita í miklum fjárhagsvandræðum og svoleiðis upphæð myndi gera gríðarlega mikið fyrir félagið.
PSG er talið hafa boðið 169 milljónir punda í Yamal í mars en því boði var hafnað af spænska liðinu.