Það eru margir knattspyrnuáhugamenn sem kannast við Clive Tyldesley sem hefur starfað í sjónvarpi í mörg, mörg ár.
Tyldesley hefur starfað fyrir ITV undanfarin 28 ár og var á sínum tíma einn af lýsendum tölvuleiksins FIFA sem í dag heitir EA Sports FC.
Tyldesley er með ITV á EM í Þýskalandi en var tjáð að fara heim eftir að 16-liða úrslitin myndu klárast.
ITV hefur tekið þá ákvörðun að framlengja ekki samning Tyldesley sem er því atvinnulaus en hann er 69 ára gamall.
Fræg rödd er því án starfs sem aðrar sjónvarpsstöðvar gætu nýtt sér en vinnubrögð ITV þykja ekki vera til fyrirmyndar.
,,Ég hef vitað af þessu í fimm eða sex vikur,“ sagði Tyldesley í samtali við the Daily Mail.
,,Yfirmaður fótboltans á ITV hringdi í mig og sagði við mig að ég væri á leiðinni heim eftir 16-liða úrslitin.“
,,Ég spurði hvort það væru einhver önnur tækifæri í boði en hann sagði að það væri ekki í plönunum að bjóða mér nýjan samning og það er allt saman, eftir 28 ár.“
,,Þetta er bara þeirra skoðun og þeir telja að þetta sé rétt ákvörðun. Ég veit ekki af hverju þeir halda það. Ég hef aldrei skilið þetta en verð að sætta mig við það.“