Segja má að framtak FH-inga að styrkja Píeta samtökin með sölu á treyju félagsins hafi vakið mikla lukku. FH opinberaði á dögunum þriðju treyju félagsins sem er gul á litinn.
Þúsund krónur af hverri treyju renna til Píeta samtakanan. Ástæðan fyrir gula litnum í treyjunni er Gulur september sem er mánuður vitundarvakningar um geðheilbrigði og sjálfsvígsforvarnir.
Benedikt Þór Guðmundsson sem starfar sem ráðgjafi hjá Píeta segir að treyjan og sýnileiki hennar hafi orðið til þess að fólk sem er með slíkar hugsanir hafi samband.
Garðar Ingi Leifsson, markaðsstjóri FH ræddi um treyjuna í Brennslunni á FM957 í morgun. „Ég hitti Benna hjá Píeta samtökunum í gær, hann þakkaði fyrir hvað þetta hefur gengið vel og góð birting á þessu. Svo sagði hann við mig að við værum búnir að bjarga mannslífum, það fór beint í hjartað,“ sagði Garðar á FM957.
„Síminn er búinn að hringja miklu oftar eftir að treyjan fór í loftið, hann sagði mér að þegar við spiluðum við Fram. Hann sagði á meðan leiknum stóð voru þrír sem horfðu á leikinn og báðu um viðtal.“
FH byrjaði á svona verkefnum í fyrra þegar félagið gaf út bleikan þriðja búning og styrki þá Bleiku slaufuna. „Við erum með hvítan aðalbúning, svartan varabúning. Við getum ekki spilað í hvítu eða svörtu gegn KR í Vesturbænum, við vildum gera eitthvað meira en bara þriðju treyjuna,“ sagði Garðar.
Um Píeta samtökin:
Píeta veitir fyrstu hjálp, aðgengilega þjónustu, stuðning og meðferð fyrir þá sem eru í sjálfsvígshættu og brú í úrræði fyrir aðra. Þjónustan er með öllu gjaldfrjáls og stendur til boða öllum þeim sem hafa náð átján ára aldri. Píeta samtökin vinna einnig að því að efla þekkingu og skilning á sálrænum sársauka og sjálfsvígum. Samtökin vilja vera leiðandi í forvarnarstarfi gegn sjálfsvígum á Íslandi.