„Mér brá heldur betur í brún þegar karlalið Fylkis í fótbolta voru sakað um kynþáttaníð á dögunum. Það skal tekið mjög skýrt fram að ég er stuðningsmaður Fylkis enda mitt uppeldisfélag og það félag þar sem sonur minn stundar sínar íþróttir í dag.“ skrifar Bjarni Helgason, blaðamaður Morgunblaðsins í blaðið í dag.
Bjarni skrifar þar skoðanapistil um mál Vestra og Fylkis, á dögunum var leikmaður Fylkis sakaður um kynþáttaníð þegar liðið vann sigur á Vestra. KSÍ rannsakaði málið en ákvað að aðhafast ekki meira.
„Ég átti mjög erfitt með að trúa þessu og sem betur fer kannski þá var ég og er lítið í vinnu þessa dagana þar sem ég er í fæðingarorlofi. Ég var því ekki mikið að kafa ofan í málið, eins og ég hefði eflaust gert ef ég væri við vinnu á hverjum degi. Ég ákvað hins vegar að kafa aðeins ofan í það eftir að KSÍ tilkynnti að sambandið myndi ekki aðhafast frekar í málinu á mánudaginn síðasta,“ skrifar Bjarni
Davíð Smári Lamude þjálfari Vestra greindi frá málinu í viðtal eftir leik og stendur Vestri við fyrri yfirlýsingar þrátt fyrir að KSÍ geri ekkert í málinu.
Bjarni segir það mjög alvarlegt að saka aðila um kynþáttaníð. „Það ætti að vera öllum ljóst að það að ásaka einhvern um kynþáttaníð er háalvarlegt. Kynþáttaníð er eitthvað sem á ekki að sjást í fótboltanum og blessunarlega hefur íslenski boltinn verið nánast laus við kynþáttaníð frá því að ég man eftir mér í það minnsta. Þjálfara Vestra var augljóslega mjög heitt í hamsi þegar hann mætti í viðtal hjá Stöð 2 Sport strax eftir leik. Hann nefnir aldrei kynþáttaníð í leiknum í öðrum viðtölum eftir leikinn, þar sem
hann hafði fengið smátíma til þess að anda og róa sig niður.“
Bjarni segist hafa kafað yfir öll gögn málsins. „Eftir að hafa skoðað öll gögn málsins er ekki hægt að ætla neitt annað en að allt tal um kynþáttaníð í Árbænum sé fyrst og fremst rógburður. Vestramenn ættu að sjá sóma sinn í því að biðjast afsökunar á framferði sínu og að hafa sakað Árbæinga um kynþáttaníð frammi fyrir alþjóð.“