Gary Lineker sjónvarpsmaður á BBC segir að hann hafi fengið símtal fyrir tveimur vikum að það yrði tilkynnt fljótlega að Alan Hansen væri látinn.

Hansen var þá á sjúkrahúsi í Bretlandi en hann er fyrrum varnarmaður Liverpool og starfaði lengi með Lineker á BBC.

Hansen var þungt haldinn á sjúkrahúsi og var talið að hann ætti lítið eftir og færi aldrei aftur heim. Hið ótrúlega hefur hins vegar gerst, Hansen hefur á tveimur vikum náð ótrúlegum bata og er mættur heim til sín.

„Ég fékk sms skilaboð frá Janet Hansen, eiginkonu hans um að hann væri mættur heim. Þetta eru frábærar fréttir,“ sagði Lineker.

Hansen er 69 ára gamall og var mjög vinsæll sem sérfræðingut í Match of the Day þættinum sem Lineker stýrir hjá BBC.

„Ég ætla ekki að segja frá því hver hringdi í mig en fyrir tveimur vikum kom símtalið um að andlát hans yrði opinberað fljótlega.“

„Ég brotnaði niður en nokkru síðar komst ég að því að þetta væri kannski ekki svo slæmt. Hann komst í gegnum þetta sem er magnað. Ég vona að þú hlustir á okkur Hansen, þetta er svo vel gert hjá þér.“