„Þetta er svekkjandi. Þetta var gríðarlega erfiður leikur. Það fór mikil orka í leikinn á föstudaginn og það voru tveir dagar á milli leikja. Við spiluðum nokkuð vel. Þeir fundu of mikið af glufum á bak við okkur en svona var þetta. Við lærum af þessum leik eins og öllum öðrum,“ sagði landsliðsfyrirliðinn Jóhann Berg Guðmundsson við Stöð 2 Sport eftir 4-0 tap gegn Hollandi í vináttulandsleik í kvöld.
Holland var einfaldlega of stór biti fyrir íslenska liðið í kvöld, sem vann stórkostlegan sigur á Englandi fyrir helgi.
„Þeir yfirmönnuðu kantana mjög vel og við náðum ekki að setja pressu á þá, sérstaklega þessar fyrirgjafir sem voru að koma. Þetta er bara eitthvað sem við þurfum að laga.“
Jóhann segir íslenska liðið þó læra af þessum leik.
„Þegar við spilum erum við mjög góðir á boltanum. Mér fannst við smá kærulausir á boltanum í dag, léleg fyrsta snerting og þá ertu kominn í vesen. Á móti svona þjóð þarf allt að vera upp á tíu.“