Arsenal tók nágranna sína í Chelsea og slátraði þeim í ensku úrvalsdeildinni í kvöld. Leikurinn fór fram á Emirates vellinum í London.
Leandro Trossard skoraði eina mark fyrri hálfleiks þar sem bæði lið ógnuðu marki. Chelsea var þá meira með boltann en Arsenal gerði vel.
Í síðari hálfleik henti Arsenal í algjöra sýningu þar sem Ben White skoraði tvö og Kai Havertz setti tvö. Lokastaðan 5-0.
Havertz var seldur til Arsenal frá Chelsea síðasta sumar, kaup sem voru umdeild en hafa svo sannarlega heppnast vel.
Arsenal er komið með þriggja stiga forskot á Liverpool á toppi deildarinnar en Liverpool á leik til góða. Manchester City er svo fjórum stigum á eftir en á tvo leiki til góða.