„Ég er mjög ánægður hérna og hér líður mér vel,“ sagði Andri við spænska miðilinn Relevo, en kappinn gekk endanlega í raðir Lyngby á dögunum eftir að hafa verið þar á láni frá Norrköping.
Hinn 22 ára gamli Andri er auðvitað sonur knattspyrnugoðsagnarinnar Eiðs Smára Guðjohnsen. Hann ætlaði sér alltaf langt.
„Pabbi sagði mér að það að vera fótboltamaður sé að gera það sem þú elskar í hverri viku, en að það reyni mjög á andlega þáttinn. Þú ert minna með fjölskyldum, það eru löng ferðalög og þess háttar.“
Andri er fæddur í London, þar sem faðir hans spilaði með Chelsea. Hann æfði svo með yngri liðum Barcelona, þar sem Eiður spilaði einnig, en fór svo í akademíu nágrannanna í Espanyol frá 2015-2018.
„Þetta voru góð ár. Þú lærir mikið á því að vera í svona félagi. Leikirnir gegn Barcelona voru mjög skemmtilegir. Þú spilaðir gegn leikmönnum á mjög háu stigi,“ sagði Andri um tímann þar.
Eftir veruna hjá Espanyol gat Andri svo valið milli Barcelona og Real Madrid, ekki amalegt val það.
„Barca talaði við mig en þegar kallið kom frá Madríd vissi ég að ég vildi klæðast hvítu treyjunni. Pabbi spilaði auðvitað fyrir Barca sem er auðvitað mjög stór klúbbur líka en það var eitthvað við Real Madrid sem kallaði á mig,“ sagði Andri sem gekk í raðir Real Madrid.
Þar var hann í fjögur ár, frá 2018-2022 og spilaði með yngri liðum og varaliðinu.
„Allt var í hæsta gæðaflokki. Vellirnir, þjálfararnir, búningsklefarnir. Þetta var besta aðstaða í heimi og þú lærir að kunna að meta að spila þarna.“
Tíminn hjá Real Madrid var þó ekki aðeins dans á rósum en Andri sleit krossband fyrir tímabilið 2020-2021.
„Þú lærir mikið af svona og þetta breytir aðeins sýn þinni á fótboltann og lífið. Þú lærir að hlutirnir ganga ekki alltaf upp og þarft að leggja hart að þér ef þú vilt virkilega snúa aftur á völlinn.“
Sem fyrr segir er Andri nú hjá Lyngby, þar sem hann hefur fengið traustið og staðið sig vel.
„Þegar þú kemur til liðs og spilar mikið af mínútum finnurðu fyrir pressu. En ég vissi hvað ég gæti gefið liðinu. Þú finnur hvað þú ert mikilvægur.“
Andri spilaði sinn fyrsta landsleik árið 2021 og er nú fastamaður í íslenska hópnum.
„Að spila fyrsta landsleikinn var mjög mikilvægt fyrir mig og fjölskyldu mína. Það er ekkert eins og að spila fyrir landsliðið. Ég er mjög glaður yfir því að vera að spila með landsliðinu,“ sagði Andri.
Viðtalið í heild má nálgast hér.