Eden Hazard, fyrrum leikmaður Chelsea, hefur valið besta leikmann sögunnar og valdi hvorki Lionel Messi né Cristiano Ronaldo sem voru að margra mati þeir bestu í langan, langan tíma.
Hazard hefur lagt skóna á hilluna 33 ára gamall en hann endaði ferilinn hjá Real Madrid á Spáni.
Hazard segir að Zinedine Zidane sé sá besti frá upphafi en hann lék einnig með Real og þjálfaði Belgann á sínum tíma í Madríd.
,,Messi er nafnið sem flestir hugsa um ef þú hugsar aðeins um fótbolta en fólk hefur sína skoðun,“ sagði Hazard.
,,Ronaldo er bestur þegar kemur að því að skora mörk og vinna titla fyrir sitt lið, horfið á hann í dag. Hann er 39 ára gamall og gæti skorað mörk þar til hann verður fimmtugur, treystið mér.“
,,Ég spilaði meira eins og Messi frekar en Ronaldo en að mínu mati þá er Zidane besti leikmaður sögunnar.“
,,Listinn er svona, Zidane, John Obi Mikel og svo Messi,“ bætti Hazard við en hann var gestur í hlaðvarpsþætti Obi Mikel – þeir léku saman hjá Chelsea um tíma.