Theodór Elmar Bjarnason, fyrrum landsliðsmaður og leikmaður KR, var gestur í nýjasta þætti Íþróttavikunnar. Helgi Fannar Sigurðsson og Hrafnkell Freyr Ágústsson hafa umsjón með þættinum, sem kemur út alla föstudaga á 433.is, Hringbraut.is og í Sjónvarpi Símans.

Það eru spennandi tímar hjá KR. Auknir fjármunir hafa verið settir í félagið og þá var Gregg Ryder ráðinn nýr þjálfari.

„Þetta er nýtt upphaf með nýjum þjálfara. Eins og staðan er núna eru menn mjög spenntir,“ sagði Elmar, sem er mjög hrifinn af Ryder og hans hugmyndafræði.

„Ég er ekkert eðlilega ánægður með hann. Hann kemur með ferskan anda, er mjög djarfur þjálfari og sóknarþenkjandi. Ég tel að það muni henta mér og mörgum öðrum leikmönnum í liðinu. Hann er skemmtilegur karakter svo þetta er spennandi.

Ég mun ábyggilega spila flesta leiki framarlega á miðjunni, þar sem ég hefði átt að spila allan minn feril, en þjálfarar eru mismunandi.“

Rúnar Kristinsson, goðsögn hjá KR, yfirgaf félagið í haust eftir að samningur hans var ekki endurnýjaður.

„Þetta er allt saman nýtt fyrir öllum. Rúnar er búinn að vera lengi og gera frábæra hluti. Menn voru komnir í einhverja rútínu með það. Nú er nýr þjálfari, nýtt teymi. Þá breytast hlutirnir og þá fara menn að taka eftir ýmsum hlutum. Maður tekur alveg eftir því að það er aukinn áhugi og verið að fylgjast betur með.“

Aron Sigurðarson og Alex Þór Hauksson eru þegar komnir til KR úr atvinnumennsku.

„Þetta eru tveir leikmenn sem, ef allt er eðlilegt, ættu að vera í hópi betri manna á íslandsmótinu. Miðað við fyrstu vikurnar stefnir í það. En við sem lið þurfum að geta eitthvað til að þeir nái að skína,“ sagði Elmar.

Umræðan í heild er í spilaranum.