Guðmundur Benediktsson, sérfræðingur Bestu deildarinnar og íþróttafréttamaður segir frá því að það hafi verið löngu ákveðið hjá Breiðablik að nýta ekki klefana í Víkinni í gær. Segir Gummi Ben að Blikar hafi verið í rafmagnslausum klefa í Víkinni í fyrra.

Segir Guðmundur að tengist ekkert því ósætti sem var á milli Breiðabliks og KSÍ vegna þess að leiknum var ekki frestað.

Blikar mættu skömmu fyrir leik gegn Víkingi í gær eftir að hafa komið saman í Kópavogi og undirbúið sig þar. Segir Guðmundur að það hafi ekki tengst því að leiknum var ekki frestað.

„Það er svolítið síðan að ég heyrði að þetta væri í plönum Óskars áður en Evrópuævintýrið hófst, þeir ætluðu ekki að nýta klefann sem Víkingar bjóða þeim upp á. Af fyrri reynslu, það hafi ekki verið rafmagn í þeim klefa,“ sagði Guðmundur á Stöð2 Sport í kvöld og vildi meina að klefinn hefði verið rafmagnslaus í fyrra.

„Mér skilst að það hafi ekki verið neitt rafmagn, ég heyrði að það væri langt síðan að þeir ætluðu að mæta í rútu og ekki nýta sér klefann.“

„Ég stend við orð mín en ég veit ekki hvort einhver hafi tekið rafmagnið af eða hvort rafmagnið hafi bara ekki virkað.“

Víkingur vann góðan sigur á Blikum en Blikar stilltu upp breyttu liði vegna þátttöku liðsins í Evrópukeppni á fimmtudag þar sem liðið getur tryggt sig inn í riðlakeppni. Víkingur er hins vegar á barmi þess að verða Íslandsmeistari eftir sigurinn í gær.