Klara Bjartmarz, framkvæmdarstjóri KSÍ, hefur vísað máli Kjartans Henry Finnbogasonar, sóknarmanns FH til aganefndar sambandsins. Þetta herma heimildir 433.is.

Kjartan Henry var mikið í fréttum eftir leik Víkings og FH í Bestu deild karla á dögunum. Framherjinn knái lét þá kappið bera fegurðina ofurliði.

Í fyrri hálfleik gaf Kjartan Nikolaj Hansen, leikmanni Víkings, olnbogaskot svo hann lá blóðugur eftir. Sparkaði hann einnig í átt að andliti Birnis Snæs Ingasonar.

„Það að ég hafi viljandi gefið Niko olnbogaskot er svo fjarri lagi, þetta var algjört óviljaverk. Ég var að dekka einn sterkasta framherja deildarinnar og reyna að passa að hann kæmist ekki fram fyrir mig. Sem betur fer slapp hann með blóðnasir. Annað eins hefur gerst á fótboltavelli,“ sagði Kjartan Henry eftir atvikið.

Aganefnd KSÍ mun fara yfir atvikið eftir að Klara vísaði málinu þangað og taka ákvörðun um það hvort dæma eigi framherjann í leikbann.