Gylfi Þór Sigurðsson hefur hug á að spila fótbolta aftur, þessu heldur Vísir.is fram en mál gegn Gylfa þór var látið niður falla í gær. Er hann frjáls ferða sinna.

„Samkvæmt upplýsingum Vísis er Gylfi hins vegar í góðu líkamlegu ástandi og með hug á að endurvekja ferilinn þrátt fyrir að hafa neyðst til að halda sig utan vallar í tæplega tvö ár vegna málsins,“ sagði í frétt sem Vísir birti í gær.

Gylfi Þór var í farbanni í 637 daga í Bretlandi og hefur ekki spilað fótbolta á þeim tíma, samningur hans við Everton rann út síðasta sumar.

Sá möguleiki er fyrir hendi að Gylfi kjósi að spila áfram á Englandi og miðað við afrek hans þar með Swansea, Tottenham og Everton má ætla að lið þar í landi vilji klófesta hinn 33 ára gamla miðjumann en aðrir kostir verða í boði vilji Gylfi snúa aftur á völlinn.

Fimm kostir sem gætu komið á borð Gylfa:

Lið í ensku úrvalsdeildinni:
Gylfi hefur afrekað ansi mikið í enska boltanum og búið sér til orðspor sem lifir lengi, ætla má að mörg félög í ensku úrvalsdeildinni muni skoða þann kost að semja við Gylfa Þór í sumar.

Sádí Arabía
Fótboltinn í Sádí Arabíu er í mikilli sókn, eru miklir fjármunir í boði fyrir frambærilega knattspyrnumenn. Gæti það heillað Gylfa að þéna alvöru upphæðir eftir ár án launa. Rétt áður en mál Gylfa kom upp stóð honum til boða að þéna rosalegar upphæðir í Sádí.

Katar
Sömu sögu er að segja í Katar, góðir knattspyrnumenn fá afar vel borgað í Katar. Stærstu liðin þar í landi gætu svo sannarlega sett sig í samband við Gylfa.

Bandaríkin:
Áður en lögreglan í Mancehester handtók Gylfa hafði Gylfi ítrekað verið orðaður við lið í Bandaríkjunum og heyrðist nafn Los Angeles FC oft í því samhengi.

FH:
Vilji Gylfi rólegt og auðvelt líf gæti hann snúið heim og skellt sér í treyju FH, uppeldisfélagið tæki vel á móti sínum dáðasta syni.