Sir Jim Ratcliffe ætlar sér að ráða inn Graham Potter sem næsta stjóra Manchester United ef marka má frétt breska götublaðsins The Sun.

Sæti Erik ten Hag, núverandi stjóra United, er ansi heitt en liðinu hefur gengið illa í ensku úrvalsdeildinni það sem af er leiktíð og endaði þá á botni síns riðils í Meistaradeild Evrópu.

Ratcliffe mun á næstu dögum eignast 25% hlut í United og tekur hann yfir stjórn á fótboltahlið félagsins. Sagt er að hann hafi þegar hitt Potter og rætt við hann um að taka við ef Ten Hag fer.

Milljarðamæringurinn er mikill aðdáandi Potter og hefur einnig reynt að ráða hann til Nice, sem einnig er í hans eigu.

Potter hefur verið án starfs síðan í apríl. Á dögunum hafnaði hann því að taka við Stoke í ensku B-deildinni. Er hann aðeins til í að snúa aftur til starfa fyrir stórlið.