Aron Jóhannsson gekk í síðasta mánuði í raðir Aftureldingar í Lengjudeildinni eftir að hafa rift samningi sínum við Fram. Magnús Már Einarsson, þjálfari liðsins, segir að hann hafi lengi verið að eltast við miðjumanninn.

Hinn 29 ára gamli Aron hafði verið í eitt tímabil hjá Fram í Bestu deildinni en hann hefur einnig leikið með Grindavík og Haukum.

„Ég tók þrjá fundi með honum í fyrra. Hann á tengingar í Mosfellsbæinn, tengdafjölskyldan hans býr þar. Hann var nálægt þessu í fyrra en endaði í Fram þá. Svo rifti hann samningnum við Fram í haust og þá þýddi ekkert annað en að gera aðra tilraun. Ég þurfti ekki eins marga fundi í ár til að sannfæra hann. Ég held að hann hafi séð í sumar að það hafi eitthvað verið til í því sem ég sagði á fundunum í fyrra,“ segir Magnús í hlaðvarpsviðtali við 433.is.

„Það er jákvætt að menn sjái hvað við erum að gera og vilji koma og taka þátt í því með okkur.“

Magnús talar afar vel um Aron sem leikmann.

„Hann er frábær leikmaður. Við erum búnir að hafa augastað á honum lengi og teljum að hann henti mjög vel inn í okkar leikstíl. Við erum gríðarlega ánægð með að hafa fengið hann til okkar.“