Erik ten Hag, stjóri Manchester United segir það tóma þvælu að stór hluti leikmannahópsins hjá félaginu vilji losna við hann.

Slíkar sögur hafa verið sagðar í enskum blöðum að um helmingur leikmanna United hafi fengið nóg af Ten Hag.

United tekur á móti Chelsea í ensku úrvalsdeildinni á morgun eftir slæmt tap gegn Newcastle á laugardag.

„Það eru enginn læti í klefanum, það er mikið af kjaftasögum en það hefur ekki áhrif. Við erum á vegferð, við vitum að við erum í breytingum en við erum á réttri leið,“ segir Ten Hag.

„Við erum með lið og reynum að bæta það. Liðið er að taka á sig mynd, ungir leikmenn eru að koma inn og þú sérð að þeir geta orðið góðir fyrir Manchester United í framtíðinni.“

Ten Hag segist hlusta á leikmennina sína ef þeir hafa eitthvað að segja.

„Ég hlusta á leikmennina og ég gef þeim tækifæri til að ræða við mig ef þeir vilja spila öðruvísi.“

„Það er kannski einn eða tveir sem hafa gert það, flestir vilja spila eins og ég. Þú sér að leikmenn eru með mér í liði ef þú skoðar frammistöðuna gegn Everton og Galatasaray.“